MAYU: MES DE LA LLINGUA ASTURIANA.

08-jun.

Nel mes de mayu desendolcáronse munches xeres en tolos requexos d’Asturies pa celebrar la XL Selmana de les Lletres Asturianes, el nuesu colexu nun diba ser menos.

Trabayamos en clase aspeutos de la música tradicional asturiama, dende la tonada hasta la música d’anguañu, pasando tamién polos instrumentos.

Escolinos y escolinos de varios cursos recoyeron los premios del VI certame de poesía en llingua asturiana (nel que participó tol alumnáu) y que foi  entamáu pol Aula de les Metáfores, la Casa conceyu de Grau  y la Conseyería d’Educación y Cultura del Principáu d’Asturies:

Ana Beunza Riesco (5u A)

“Lleer”

Na ponte l’horru

sentéme a lleer.

Pasóme esnalando un raitán.

Y  desconcentré.

Una formiga xubióme pela pierna,

fízome cosquielles,

y ente medies

la muxina peluda rozóme una mano

y pasáronme les fueyes toes esnalando.

Nun lleí nin una páxina

pero esfruté

col raitán, cola formiga

y cola muxina tamién.

Mañana bien ceu

entamo otra vegada

a lleer esti llibru

que merezlu bien.

 

Alma Ayora Sousa  (4u B)  

“Les abeyes”.

Na enxeita

ta la vieya abeya

prieta y mariella.

Les abeyes

van y tornen

y siempre miel tienen.

La reina

esnala y esnala

y enxamás trabaya.

De flor en flor

van xugando ensín parar

enantes de xintar.

 

Rocío Aguirre González. (4u B)

“La primavera”.

Entamó la primavera,

el sol relluma nel cielu

toles mañanes.

Les flores ñacieron

nel prau verde

del mio tíu Xuanín.

Cuando’l sol

entama a guardase

poco a poco, la lluna apaez.

Güei entamó a llover,

les flores muéyense

y los pétalos ciérrense.

 

Ikram El Azhari

“Un gatu pequeñín”

Había un gatu pequeñin,

taba pensando nel mar.

Xugando col so xuguetín

durmióse nel xardín,

pensando na so ma,

pensando nel so pá.

Llueu espertóse

contentu y feliz.

Yera un gatín pequeñín

 

Miguel Cernuda García. (2u)

“El viaxe”.

Ye un día de viaxe,

los páxaros cancien.

Ye un dia de viaxe,

les flores falen.

Ye un día de viaxe,

los neños cancien

y falen colos páxaros.

¡Al campu a esnalar, esnalar!.

Y los páxaros

nun paren

d’abrazar a la lluna.

al finar.

 

Abel Miranda García (2u )

 “Lluna y mar.

Lluna, llunarina

carina de miel,

Pronto nun cohete

diremos a vete.

Sirena, sirenina,

yes mui guapa

y tamién mui fina.

Vives nel mar de les maravilles.

Coríos y pites

véivos acostar.

Llobos nel monte

y coríos nel mar.

Yá toos tán durmiendo,

yagora

los mayores a xugar.

 

Candela Fernández Solís de 6u B recoyó el 2u premiu del concursu de microrrellatos a nivel autonómicu, entamáu pola Conseyeria d’Educación y Cultura del Principáu d’Asturies:

"Yera un día pela nueche, aquel esperteyu del demoniu espertó del so lletargu. Abrió los güeyos y entamó a esnalar, recorrió tol castiellu pa revisar que nos caberos años  tuviera too nel mismu sitiu.

Quedó ablucáu y dixo:

-“¿Qué fae equí esti espeyu?”  y como yera mui presumíu púnxose a mirase nel espeyu cuando, de sópitu,.…..una mano verde salió de dientro del espeyu y coyólu d’una nala.

Ente les solombres y la escuridá alcontró a la muerte que-y dixo:

-“Fae munchos años, los tos pas tresportáronte al mundu de los vivos pa que’l diañu nun te reclutare y nun sofrieres un destín terrible. Güei vendrás comigo si nun quies que te llegue la to hora, entregaráste al diañu y serviráslu pa siempre”.

L’esperteyu, que nun quiría morrer, entamó a esnalar lo más rápido que pudo. La muerte xubióse a un caballu con nales y persiguiólu con conxuros y maldiciones. Él esquivabela, ella cansóse y coló enfocicada.

Llegó un esperteyu fema y llevólu a un refuxu onde taben tolos esperteyos qu’escaparen tamién. Xuntáronse toos y foron a atacar  a la muerte, llograron vencela y dende entós el país de les tiniebles foi más allegre”.

El teatru n’asturianu triunfó por tolo alto nel patiu de la Casa Cultura de Grau coles escolines y los escolinos de terceru y “El mur Frederick” y la tutoría de  4u B y “¿Hai daqué más aburríu que ser una princesa rosa?”. Pinchar aquí para ver el vídeo.

Galeria de imágenes

ImagenImagenImagenImagenImagenImagenImagenImagenImagen
Volver